Публикации » Руслан Тихонов Шăмăршăсен ĕçĕ-хĕлĕпе кăмăллă юлнă

10 июня 2014 г.

Иртнĕ кĕçнерни кун пирĕн районта Раççей Федерацийĕн VI созыври Федераци Пухăвĕн Патшалăх Думин депутачĕ Руслан Тихонов ĕçлĕ çул çỹревпе пулнă. Район администрацийĕн пуçлăхĕпе Валерий Фадеевпа пĕрле вĕсем Шăмăршă районĕн ыйтăвĕсене тата ял пурнăçĕн проблемисене сỹтсе явнă. Депутат Шăмăршăсен ĕçĕ-хĕлĕпе кăмăллă пулни çинчен пĕлтернĕ. Руслан Тихоновпа Валерий Фадеев Хырла çырми çинче тăвакан шыв управне, Шăмăршăри "Туслăх" спорт комплексне, халăхăн социаллă пурнăçне тивĕçтерекен центрта тăвакан объекта çитсе курнă. Юлашки тĕл пулу Шăмăршăри "Юмах" ача сачĕнче ĕçлекенсемпе иртнĕ. Район администрацийĕн пуçлăхĕ Валерий Фадеев пĕлтернĕ тăрăх, çак ача садне хута яни районта садик черетне пĕтĕмпех пĕтерме май панă. Руслан Тихоновпа Валерий Фадеев ачасемпе воспитательсене Пĕтĕм тĕнчери ачасене хỹтĕлемелли кун ячĕпе саламланă.

С.ИВАНОВ.

Источник: "Шăмăршă хыпарĕ"