18 апреля 2014 г.
Кĕçнерни кун "Туслăх" физкультурăпа спорт комплексĕнче Чăваш Республикинчи патшалăх влаçĕн органĕсемпе вырăнти хăйтытăмлăхра ĕçлекенсен XIII Спартакиадин зонăри ăмăртăвĕ иртрĕ. Унта Шăмăршă, Елчĕк, Канаш тата Комсомольски район администрацийĕсен командисем хутшăнчĕç. Ăмăртăва саламлă сăмахпа район администрацийĕн пуçлăхĕн çумĕ В.Петьков уçрĕ, пурне те ăнăçу сунчĕ. Сĕтел çинчи теннис вăййисенче Канаш районĕн команди - пĕрремĕш, комсомольскисем - иккĕмĕш, шăмăршăсем виççĕмĕш вырăн йышăнчĕç. Шашкăлла выляса комсомольскисем çĕнтерчĕç. Шăмăршă районĕн команди - иккĕмĕш, канашсем - виççĕмĕш вырăнта. Шахмат вăййинче вара малти виçĕ вырăна Шăмăршă, Елчĕк тата Канаш районĕсен командисем пайларĕç. Картишĕнчи баскетбол вăййи те питĕ интереслĕ иртрĕ. Кунта Комсомольски районĕн команди - пĕрремĕш, Шăмăршă команди - иккĕмĕш, Канаш команди виççĕмĕш вырăн йышăнчĕç. Мала тухнă командăсем Спартакиадăн Шупашкарта иртекен финалти вăййисене хутшăнаççĕ.
С.ГАЛКИН, "Туслăх" физкультурăпа спорт комплексĕн директорĕ.
Источник: "Шăмăршă хыпарĕ"
Источник: "Шăмăршă хыпарĕ"