08 августа 2013 г.
Çĕмĕрле районĕнче шоссе çинчи велокросс енĕпе Чăваш Республикин Кубокне çĕнсе илессипе ăмăртусем пулса иртнĕ. Çакă – пирĕн тăрăхшăн спортăн çĕнĕ енĕ. Хальхинче ăна республикăри паллă велосипедиста – Валерий Ярдыне халалланă.
Ăмăртăва пирĕн районти «Туслăх» физкультурăпа спорт комплексĕнчи ачасемпе çамрăксен спорт шкулĕнчи Илья Хлюкин та хутшăннă. Инçе çула тухни ахаль пулман: Илья хăйĕн ÿсĕмĕнче спортсменсемпе харпăр хăй тĕллĕн ăмăртса иккĕмĕш вырăн йышăннă.
Илья Хлюкин спортăн ытти ăмăртăвĕсене те тăтăшах хутшăнать, кашнинчех пысăк результатсемпе савăнтарать. Сăмах май, вăл ăмăртусенче çĕнсе илнĕ наградăсен хисепĕ те ÿссех пырать.